அம்சங்கள்

சிக்கனமாய் நீ சிரிப்ப
சிறு முத்தம்தான் கொடுப்ப
உன் கண்ணயரும் வேளையிலும்
என் கைபட்டா கதறிடுவ

மார்போடு உனைசாய்க்க
மணிக்கணக்கில் ஏங்க வைப்ப

கொஞ்சித்தவழ்ந்தோடுவ
கொஞ்சமாய் நடை போடுவ
சின்னதாய் தள்ளாடுவ
சில சமயம் தரைமோதுவ

மண்டியிட்டு நான் தூக்க
மல்லாக்காய் நீ குதிப்ப
ஏக்கத்தில் நான் தவிக்க
ஏகாந்தமாய் நீ சிரிப்ப

தொட்டுவிடா தூரத்தில் தள்ளி நிற்ப
ஓரக்கண் உயர்த்தி புன்னைகைப்ப

பிடிவாதம் தவறுன்னு புருஞ்சிருப்ப
தவறாம அதனால தவிக்கவைப்ப

இம்சைகள் இல்லையடி - இவை 
உன் அம்சங்கள் நானறிவேன்

பரிசொன்னு வேணும்மான்னா
உன் ஸ்பரிசம் தவிர்த்து என்னகேட்பேன்..

                                                             - அப்பா 

(மை)யல்

மையிட்ட கண்கள் கண்டேன்
மையல் கொண்டேன்...

கார்மேகம் கண்டு தோகை விரித்தாடும் மயில் கூட
உன் மோகம் கொண்டு நான் வருகையில்
உன் கருவிழி சிறு நடனம் முன் தோற்றோடுகிறது..


உன் கண் பேசும் கவிதைக்கு
உன் கால் கொலுசு இசை இருக்கு..
இசைஞானி இங்கு எதற்கு
உன் கால் கொலுசிசை போதுமே எனக்கு..

ஒருமையிலே நீ இருக்க
பொருமைதனை நான் இலக்க
பன்மையிலே பார் மறப்போம்
என் பெண் மயிலே வா பறப்போம்...